MD: “Zilarrezkoak dira”

Mundo Deportivon argitaratua. Irakurri berri originala >>

Aitor Urbitarte, Amenabar-Zarautzeko entrenatzailea, pozik mailari eutsita

Aitor Urbitarte, Amenabar-Zarautzeko entrenatzailea, pozik mailari eutsita (Luis M. Unciti – Luis M. Unciti)

Lortu dute salbazioa. Azkenaurreko jardunaldian Torrelavegan gol bakarrarengatik irabazita eta beste emaitzak alde izanda, Zilarrezko Ohorezko Mailan ariko dira datorren urtean ere Amenabar-Zarautzeko mutilak. Talde horretako entrenatzailea da Aitor Urbitarte (Zarautz, 1970) eta bizpahiru egun pasata nola sentitzen den kontatu digu: “Pixka bat lasaixeago nago, egun intentsuak izan dira eta oraindik guztiz asimilatu gabe daukat. Satisfazioa handia da oso zaila izan delako”, aitortu du.

Eskubaloiko bigarren mailan beste urtebete ziurtatzeko, esfortzu kolektibo eta pertsonala egin behar izan dute: “Lantegiko ordu asko kentzen, bideoak egiten, entrenamenduak prestatzen… Talde amateurra gara eta liga geroz eta profesionalizatuago dago. Jokalari askok txandatan lan egiten dute edo ikasten ari dira eta errepidean kilometro ugari egin behar izaten ditugu. Ezin dugu partidetara bezperatik bidaiatu eta azkenak lana bukatzean, ostiralean, orduantxe abiatzen gara arratsaldeko 16:00rak aldera; partida Antequeran bada, goizeko 4:00retan iristen gara. Larunbatean jokatu, gauez buelta autobusez, igande goizean iritsi eta bakoitzak umeak, andregaiak edo koadrilakoak orduan ikusten ditu”, aipatu du.

Asko baloratzen du sakrifizio hori Urbitartek , taldearekiko “harrotasuna” sentitzen duela dio eta esaldi batean laburtzen du guztia: “Familia bat gara eta eskubaloia asko maite dugu”. Merezi izan du sufrimenduak: “Orain dela bi urte azken jardunaldian salbatu ginen, iaz azkenaurrekoan eta aurten ere bai. Azken hilabetea oso zaila izan da, irteera konplikatuak genituen eta sei puntutik bost atera ditugu”, azaldu du.

Sekretua “sinesmenean” egon da entrenatzaile zarauztarraren ustez: “Barrutik beldurra izan dugu, batez ere nik. Uste nuen behera gindoazela eta zerua lainotuta zegoen, argi izpirik gabe. Sinetsi egin nuen nire buruarengan, lanean ondo ari ginela sinestarazi nien mutilei, Lanzaroteren aurkakoan, Alacanten eta Torrelavegan puntuatzeko gai ginela esan nien eta ‘klik’ hori egin genuen. Entrenamendu eta lanaren bitartez lortu dugu”. Beste sekretuetako bat “herritarren babesa” izan da: “Ikaragarria, hiru autobus joan dira asteburuan Torrelavegara. Larunbateko azken jardunaldian etxeko kiroldegia berriro txiki geratuko da seguru”, esan du Aritzbataldeko harmailei begira.

Pistan erakutsitako joko mailarekin konforme dago Urbitarte eta puntuaketari dagokionez salbazioa “inoiz baino garestiago” egon dela azpimarratu du: “Beste urteetan 18 edo 19 punturekin nahikoa zen, aurten 23 edo 24rekin ere larri. Galdu ditugunak ez dira diferentzia askoz izan, beti lehiatu dugu partidetan eta agian esperientzia faltaren eraginez punturen batek ihes egin digu, baina oso gustura nago orokorrean”.

Datorren urteari begira karguan jarraitzeko asmorik ba ote duen galdetuta, oraintxe bertan “pilak agortu xamar” dauzkala onartu du: “Asko gustatzen zait, baina ahalegina eskatzen du, lantoki propio bat daukat eta ordu asko eskaini behar dizkiot. Suertez alabek eta familiak jarraitzera animatzen naute. Balantzan jarrita, agian lehengo astean esango nizun utzi egingo nuela, baina jaso dugun harrera beroa ikusita balantza orekatu egin da. Argi dudana da uzten badut, etortzen denari lagundu nahiko niokeela”, adierazi du seguru.

Lehenagoko lanak baditu ordea Aitor Urbitartek , taldeari promes egin zion salbatuz gero bibotea hilabetez hazten utziko zuela: “Ausarta naiz halako gauzetarako, ilea ere tindatu izan dut eta promesak betetzeko dira”, dio barrez. Orain beraz, bibotea hazten zaion bitartean arnasa hartu, pentsatu eta gero gerokoak. Ziurra gauza bat da, Amenabarrek zilarrezkoa izaten jarraituko duela.

Aitor Urbitarte, Amenabar-Zarautzeko entrenatzailea, pozik mailari eutsita
Aitor Urbitarte, Amenabar-Zarautzeko entrenatzailea, pozik mailari eutsita

Zarauztarren harrera

Mailari eutsi berritan, Torrelavegatik bueltan, harrera handia egin zieten herritarrek Zarauzko sarrerako errotondan: “Oilo-ipurdia jartzen zait oraindik… Malko pila bota genituen, korapiloa askatzeko malkoak izan ziren, sufrimendua poz bihurtuta”. Lehen ospakizuna halere, Kantabrian izan zen 150 zalerekin: “Pasilloa egin ziguten, manteoak ere bai… Federazioko presidentearen edota kategoriko entrenatzaileen deiak ere jaso nituen esanez Amenabarrek ezin zuela kategoriaz jaitsi, oso gustura datozela hona, kiroldegia beti beteta dagoela eta arerioari errespetua azaltzen dion plaza dela”. Bigarren ospakizuna, herrian egin zuten: “Bereziki Axier anaiak bota zidan bertsoa emozioz beteta gogoratuko dut beti”, azaldu du oraindik hunkituta. Horretaz gain, Gipuzkoako kirol munduko jende ezagunak ere zoriondu ditu, besteak beste, Realeko Imanol Alguacil, Orioko Ibon Huegun edota Hondarribiko Mikel Orbañanosek mezuak bidali dizkiote:
“Sorpresa izan da. Pozgarria da herri txiki xume bat bigarren kategorian egonda zenbat jarraitzaile dauzkan. Kultura handia dago Zarautzen, umeek kalean eskubaloira jokatzen dute eta etorkizunerako ona da hori”.

Eskubaloia, etxeko “motorra”

Ikastolan jokatzetik, kadetetan Zarauzko klubera egin zuen salto Urbitartek bere “maisu” Josu Balenciaga “eredutzat” hartuta: “Hogei urtez, 34 urtera arte jokatu nuen zentral postuan eta entrenatzaile-jokalari ere aritu nintzen bizpahiru denboralditan. Ez nintzen jaurtitzailea, baina bai azkarra, listoa”. Familia tarteko bi urtean utzi zuen, baina bueltatu egin zen lagun baten heriotzarekin bolada txarra pasatzen ari zelako: “Asobaleko igoera jokatzera ere iritsi ginen duela hiruzpalau urte”. Kantxa ertzetik pasioz bizitzen ditu partidak eta zorionez, etxekoen babesa dauka. Eskubaloiaren bitartez ezagutu zuen Alazne emazteaz gain, hamasei eta hamahiru urteko Laida eta June alabak eskubaloian aritzen dira: “Ez dago bazkari edo afari bat eskubaloirik gabe, etxeko motorra da. Animatzen naute jarraitzera, esaten didate ezin dudala utzi. Adinean gora doaz eta horrek bere alde positiboa badu, baina euren partida dezente galtzen ditut eta gehiagotan joatea gustatuko litzaidake.


 

Advertisements

Utzi mezu bat

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Aldatu )

Google+ photo

You are commenting using your Google+ account. Log Out /  Aldatu )

Twitter picture

You are commenting using your Twitter account. Log Out /  Aldatu )

Facebook photo

You are commenting using your Facebook account. Log Out /  Aldatu )

w

Connecting to %s